Дөрвөн дугуйтай дөрвөлжин цагаан мангас

2008-11-27 22:31:12

Land Rover аль ч загвар нэр хүндтэй, домог болсон байдгийг бид мэднэ. Анхнаасаа колончлогчдын хэрэгцээ шаардлагад нийцүүлж бүтээсэн болохоор аргагүй. Эдгээрийн дундаас Defender 110 хэмээх 2007 онд үйлдвэрлэсэн тэрэг унаж үзсэнээ та бүхэнтэй хуваалцая!

Энэ автомашинийг манай институт өнгөрсөн зун орон нутгийн BMW-Land Rover дилерээс 27 орчим мянган еврогоор худалдаж авсан юм. Тэр даруйдаа Тунис улс руу экспедицэд 7000-8000 км яваад ирсэнээсээ хойш ил зогсоол дээр хэвтэж байгаа нь энэ.

Энэ хугацаанд албаны тэрэг барих зөвшөөрөлтэй ажилтануудад хэрхэн яаж хэрэглэх ямар онцлогтой болох талаар хэд хэдэн семинар, туршилтийн жолоодлого хийх үед 1 цагийн турш боломжтой бүх аргаар оролдож үзэв.

Анх захиалах үед дилер хэд хэдэн ашигтай санал тавьсаны дагуу урд болон хойд талд мотор, шатаxууны савыг хамгаалах 5мм орчим зузаан хөнгөн цагаан хайлш хамгаалалт хуяг, урд хойд гэрлүүдийг хамгаалах сараалж хуяг, их биеийг хамгаалах хажуугийн хамгаалалтын гишгүүр, урд талын хамгаалах Bull bar болон цахилгаан татагч, ган хүрээтэй, хөнгөн цагаан хайлш ачаа (нэмэлт гэрлийн хамт) болон шноркел буюу агаар сорогч мэтийн тоноглолуудийг нэмж авсан гэнэ лээ...

Харин дилер бэлэг болгож урд талын суудлын хооронд байх хайрцаг (би хамаагүй гоё хайрцаг хөдөлмөрийн хичээл дээр хийдэг л байлаа, хаха) болон 1.2м HiLift өргөгч бэлэглэсэн гэсэн. Энэ загварийн хувьд 2.4 TDI дизель хөдөлгүүр, 6 шаттай механик араа, 2 шаттай хуваарилагч араа болон дифференциал цоожлогчтой, 3500кг ачаа чирэх чадалтай.

Бидний хэлдэг гар тоормос нь араан дээрээ байдаг гэв үү... араа солиход асар холоос татаад түлхээд байхгүй нь зүгээр санагдсан. Дизель тэрэг, тэр тусмаа дуу тусгаарлалт муутай гэхэд мотор нь дуу чимээ багатай юм билээ...

За над шиг жижигхэн гавшгай хурдан юм унах дуртай хүнд бол удаан, жолоодлого муутай тав тухгүй, хямдхан хийсэн юм билээ... Гэхдээ энэ шинжүүд харьцангуй бөгөөд бартаатай хол аялалын замд хөдөө хээрт бол асар чухал болон хувирана гэдгийг мэдэж байгаа ч хурдны замыг тооцохгүйгээр хотын замд ч унахад туйлын хүндрэлтэй...

Ядаж байхад 100км/цаг хурдтай барихад ч хуртэл туйлын хэцүү, салхинд цохиулчих гээд 2 тийшээ саваад л, аймаар... Харин 100км/цаг хүрэхдээ бодож байснаас хамаагүй хурдан (за байз, 20 орчим сэкунд бил үү, хэхэ) байсан.

Defender их нарийхан машин байсан шүү.. Тэр хэмжээгээрээ бартаат замд сайн жолоодлоготой байна гэж тооцсон нь гарцаагүй. Гэхдээ хашааны булан тойроод гарчихаж чадахгүй ухарч маневр хийж орсон.
Хаалга хаахад л мөр лүү айхтар цохиж, жолоодох явцад хүйтэн шилээр мөр хайраад л, үе үе нударч аваад байсныг сая саналаа... Жолооны хүрд их хатуу.

Арын суудалд сууж үзэхэд бас тухгүй, сандалд хөл тулж байсныг санаж байна... Юунд ч билээ гараа шалбалсанаа бас саналаа... Үзүүр ирмэгтэй юм дотор талд байсан гэсэн үг, их л муу даа...

Өөр нэг анзаарсан зүйл бол битүүмжлэл тааруу юм билээ... Тунисээс ирсэний дараа нил нарийн тоос байсныг их л сайн цэвэрлэсэн гэсэн ч биднийг жолоодох үед хангалттай тоостой байсан.Суудлын бүрээсийг санаагаар бол арай өөр аялал, спортын зориулалттай материалаар (жишээ нь Jeep Cherokee Columbia edition шиг) бүрэх хэрэгтэй юм шиг. Үүнд хамгийн гол нөлөөлсөн зүйл нь 5 хаалга бүгд доод хүрээгээрээ ус зайлуулаx завсартай байсных болов уу (Тэнд зүгээр л тусгаарлагч резин хийгээгүй юм билээ, үнэндээ бол...). Хэрэв би гол ус гатлах хэрэгтэй бол заавал норох хэрэгтэй гэсэн үг. Өвөл бол хүсмээр ч юм биш л санагдсан.

Энэ бүх ажиглалтууд нь хэрэглэгчийн хамгийн анхны сэтгэгдэл бөгөөд жинхэнэ бартаа, хад чулуу, шавар шавхай, алсын аялалын дараа буюу үнэхээр юу чаддаг болохыг таниад уучлилж, магадгүй хайрладаг болоход саад болохгүй бусад хүчин зүйл юм.

Одоо жинхэнэ бартаанд л явж үзмээр байна...