Хиамны вакцин

2008-11-11 20:29:21

Германы уламжлалт хүнсний бүтээгдэхүүн бол хиам гарцаагүй мөн. Хиамаа идэж хүн болно, хиамаа зарж мөнгө олно, хиамаа судлаж нээлтүүд хийнэ.

Одоогоос 200 жилийн тэртээ Вийлдбад хэмээх газар хиам идсэн 13 хүн хордож 6 нь нас барсанаас үүдэн Кернер хэмээх нэгэн эмч хиамны хордлогийн 230 тохиолдлыг судласанаа 1829 онд хэвлүүлж, хордлогыг латин хэлний botulus буюу хиам гэдэг үгээс үүдэн ботулизм гэж нэрлэж. Харин хордлогийн цаад учрыг 70 жилийн дараа Ван Ерменген нээж Clostridium botulinum бактерийн ялгаруулдаг хорноос үүдэлтэй гэж таамагласан гэдэг.

Тэгвэл өнөөдөр иммунологийн шинжээрээ ялгаатай 7 хэв шижнийн ботулин хор бий. Эдгээрээс A, B, E, F болон G хэлбэрүүд нь хүнийг хордуулдаг ба C, D хэлбэрт нь хүн тэсвэртэй.

Юун толгой эргэмээр олон янз болоод явчихав аа гэж бодож байна уу? Учир нь энэ хорнууд уураг болохоор тэр. Уураг гэдэг өндөг шигээ өөгүй эд огт биш шүү!

Ботулиныг ходоодны хүчиллэг орчин, тэнд байх пепсин мэт ферментүүд хялбар задлачихаар боловч бусад уурагтай хүч хавсарч багийн тоглолт сайн хийдэг учраас ходоодоор төвөггүй дамжиж нарийн гэдсэнд очно. Тэнд тээвэрлэгч болон хамгаалагч уургуудаасаа салж, цусны эргэлтэд нэвтэрч чадсанаараа төвийн довтолгоогоо хийж хүний мэдрэлийн систем, тэр тусмаа захын мэдрэлийн төгсгөлүүдийг хаадаг.

Ботулин эдүгээ мэдэгдэж байгаа хамгийн хүчтэй хорнуудын нэг гарцаагүй бөгөөд Zn++ буюу цахиурын ион агуулсан, тун ч эвгүй гар... 2001 онд Journal of the American Medical Association сэтгүүлд хэвлэгдсэн нэгэн өгүүлэлд бичсэнээр дор хаяж 1 сая хүнийг устгахийн тулд ердөө 1 грамм ботулин байхад хангалттай гэнэ. Хордсон хүн андашгүй; автоном мэдрэлийн систем ашиглалтаас гарсанаас болж олонхи булчин удирдлагагүй болох бөгөөд дотор муухай оргих, бөөлжих, гүйлгэх, нүд бүрэлзэх нь эхний шинж тэмдэг. Хордлогоос болж амьсгалж чадахаа больж эхэлбэл үхсэн гэсэн үг.

Ботулин уураг учраас түүнд тохирох ерөндөг эсрэг биеээр дархлаажуулах замаар урдчилан сэргийлэх боломжтой ч зөвхөн хортой гардан ажилдаг хүмүүст тэр тусмаа хөгжиж буй орнуудын мэргэжилтэнүүдийг л дархлаажуулдаг.

Бодит байдал дээр монголд хүн бүр энэ хортой гардан ажилсанаас ялгаагүй орчинд амьдарч, гуанзанд орж олон цөөнөөрөө хордсоор байгаад мэргэжилтэн болсон учраас бүх нийтээрээ дархлаажуулж эхэлсэн ч болохоор.

Дараа хамт олноороо ресторанд орохдоо урилгаа вакцин хийлгэсэн бичигтэйгээ хамт үзүүлээд л...